Անկանոն սեռական կյանքի հետեվանքները

Հարգելի խմբագրություն

Միշտ կարդում եմ ձեր հանդեսը, հատկապես սեռական առողջությանը վերաբերող հոդվածները: Ինձ մի հարց է հուզում. զուգընկերս երկար ժամանակով մեկնել է արտերկիր: Սկզբում ես հանգիստ վերաբերվեցի մեր ժամանակավոր բաժանմանը, սակայն հիմա շատ եմ զգում նրա կարիքը, նաև լսել եմ, որ սեռական կյանքում երկարատև ընդմիջումը կարող է վատ անդրադառնալ առողջության վրա: Արդյո՞ք դա այդպես է:

Կ. Հակոբյան  

Երբեմն սեռական կյանքը ժամանակավորապես ընդմիջվում է. ամուսինը (զուգընկերը) արտասահմանում է, այս կամ այն հիվանդության պատճառով սեքսն անհնարին է դառնում և այլն: Եվ հանկարծ հայտնվում է «իրազեկ ու հոգատար» ընկերուհին և հայտնում, որ սեքսի բացակայությունը կամ անկանոն սեռական կյանքը վատ են անդրադառնում հոգեկան և ֆիզիկական առողջության վրա: Դուրս եք գալիս փողոց և տեսնում, որ գովազդային պաստառի վրա տղամարդը ջերմորեն գրկել է կնոջը: Միացնում եք հեռուստացույցը, իսկ այնտեղ անկողնային տեսարան է: Այնպիսի տպավորություն է, կարծես ողջ աշխարհը սեքսով է զբաղվում, իսկ ձեր սեռական կյանքի գույները խամրել են և ամեն ինչ անկանոն է, «անշունչ»: Նման դեպքում զուգընկեր չունեցող կինը հաճախ անլիարժեքության զգացում է ունենում, մտածելով, որ ինքն այնպիսին չէ, ինչպես բոլորը... Բայց ինչո՞վ է վտանգավոր անկանոն սեռական կյանքը: Փորձենք պարզել... 

Չկարգավորված  սեռական  կյանքի և օրգազմ չզգալու հետևանքով կնոջ մոտ կարող են առաջանալ մի շարք ախտաբանական երևույթներ: 

• Սեռական սառնություն

Նորմալ սեռական  ցանկություն ունեցող կինը երկար ժամանակ սեռական բավարարվածություն չստանալու և օրգազմ չապրելու հետևանքով բացասական վերաբերմունք է դրսևորում սեռական կյանքի նկատմամբ: Նա սկսում է խուսափել ամուսնու հետ կենակցելուց, որը օրգազմով չավարտվող սեռական գրգռվածությունից բացի ուրիշ ոչինչ չի տալիս և տհաճ նստվածք է թողնում: Նման հանգամանքներում որոշ կանանց մոտ զզվանք է առաջանում սեռական կյանքի նկատմամբ և դա ամուսնուց չեն թաքցնում: Սեռական հարաբերությունից խուսափելու համար նրանք դիմում են տարբեր խորամանկությունների, օրինակ` հիվանդ են ձևանում, գանգատվում են գլխացավից և նորմալ սեռական հարաբերությանը խոչընդոտող այլ պատճառներ փնտրում: Երբեմն դիտավորյալ ինչ-որ տնային գործ են սկսում` սպասելով մինչև ամուսինը քնի, և դրանից հետո են միայն անկողին մտնում: Նման դեպքում ամուսինը հաճախ չի հասկանում, թե ինչ է կատարվում կնոջ հետ, և դիմում է բժիշկ-սեքսոպաթոլոգի` գանգատվելով, որ ՙիր բախտը չի բերել, ամուսնացել է «սառը»կնոջ հետ, որը չի ցանկանում իր հետ սեռական հարաբերություն ունենալ»: 

Ամուսինը չի հասկանում, չի գիտակցում, որ հենց իր մեղքով է ստեղծվել այդպիսի իրավիճակ և հենց ինքը կարիք ունի փոխվելու կամ բուժվելու: Կամային հատկությունից զուրկ, թույլ տղամարդիկ կորցնում են հետաքրքրությունը սեփական կնոջ նկատմամբ և սկսում են իրենց սեռական ցանկությունները բավարարել ուրիշ կանանց հետ: Իսկ դա ընտանիքը քայքայելու վտանգ է պարունակում:

Ասենք, որ սեռական ակտի ժամանակ կնոջ «սառնությունը» թեև չի խոչընդոտում, որ տղամարդն օրգազմ ապրի, բայց, այնուամենայնիվ, նրա մոտ սեռական որոշակի անբավարարվածության զգացում է առաջացնում:

• Նևրոզ

Երկարատև սեռական անբավարարվածության պատճառով կնոջ մոտ կարող են առաջանալ նևրոտիկ տարբեր ռեակցիաներ: Այդպիսի կանայք հաճախ են ունենում գլխացավեր, գերհոգնածության զգացում, կորցնում են հետաքրքրությունը կյանքի և իրենց ընտանիքի նկատմամբ, վատ են քնում, դառնում են դյուրագրգիռ` վիճելու և կռվելու պատրաստ: Որոշ դեպքերում նշված ախտանիշներն այնքան ուժեղ են արտահայտվում, որ ռեակտիվ (նևրոտիկ) դեպրեսիայի պատկեր է ստեղծվում: Նևրոզի կամ այդ տիպի դեպրեսիայի բուժման նպատակը հաճախ սեռական կյանքի կարգավորումն է: Սակայն շատ դեպքերում ամուսինները չափազանց ուշ են դիմում սեքսոպաթոլոգի` այն ժամանակ, երբ նրանց միջև ծագած տարաձայնություններն  ու  գժտությունները դժվար է լինում վերափոխել սիրո, նվիրվածության, հարգանքի զգացումների, որոնցով էլ զգալի չափով պայմանավորված է սեռական կյանքի «եղանակը»:

• Փոքր կոնքի օրգանների հիվանդություններ

Տևական սեռական անբավարարվածության` օրգազմի բացակայության հետևանքով շատ հաճախ կնոջ փոքր կոնքի օրգանների շրջանում սկսվում են բորբոքային երևույթներ,  որոնք արյունականգի հետևանք են, իսկ դա էլ հենց նպաստում է բորբոքումների առաջացմանը: Հետևաբար այդպիսի կանայք հաճախ ունենում են արգանդափողերի, արգանդի լորձաթաղանթի բորբոքումներ, ինչի պատճառով էլ կարող են ընդհանրապես չհղիանալ: Այս դեպքում դեղորայքային բուժմամբ, սովորաբար, վիճակը բարելավվում է, որը, սակայն, կարճ է տևում. լիարժեք բուժման մասին կարելի է խոսել միայն հիվանդության հիմնական պատճառը վերացնելուց, այսինքն` սեռական կյանքը կարգավորելուց հետո:

Ամուսնական չկարգավորված սեռական կյանքը և կնոջն օրգազմի չհասցնելու անհնարինությունը կարող են տղամարդու նյարդային խանգարումների պատճառ դառնալ: Նման հանգամանքներում վիրավորվում է տղամարդու ինքնասիրությունը, նա սկսում է վախենալ, որ կինը կարող է իր սեռական ցանկությունը բավարարել ուրիշ տղամարդու հետ: Դրանից տղամարդու մոտ կարող են առաջանալ նևրոզին բնորոշ ախտանիշներ` գերհոգնածություն, անքնություն, դյուրագրգռություն, գլխացավեր և այլն:

Կնոջ սեռական ցանկությունը բավարարել չկարողանալու պատճառով տղամարդկանց մոտ կարող է առաջանալ թերարժեքության բարդույթ և ամեն հարցում կնոջը զիջելու հակում: Նա կնոջ նկատմամբ դառնում է չափազանց պատրաստակամ, աշխատում է նրան զիջել յուրաքանչյուր քայլափոխի: Դրանով նա կարծես ձգտում է քավել իր «մեղքը»: Շատ դեպքերում կինը սկսում է չարաշահել ամուսնու այդպիսի վերաբերմունքն ու աշխատում նրան առավելագույնս իրեն ենթարկել: Հաճախ նա հասնում է այն աստիճանի, որ փաստորեն դառնում է ընտանիքի «գլուխը», իսկ ամուսինը համարյա զրկվում է ձայնի իրավունքից: Ի դեպ, այսպիսի իրավիճակը նույնպես չի բավարարում կնոջը, քանի որ նրա խառնվածքին բնորոշ չէ ամուսնական կյանքում բացարձակ իշխանության ձգտելը. նա պահանջ է զգում ուժեղ և բարի մի տղամարդու, որին կարելի է հանգիստ վստահել: Բացի այդ, ընտանիքում ձայնի իրավունք չունեցող ամուսինը կորցնում է կնոջ հարգանքը. մի բան, որն իր հերթին բացասաբար է անդրադառնում սեռական ակտի ժամանակ նրա զգացմունքների վրա: Այդպիսի տղամարդը հաճախ կնոջ մոտ զզվանք է առաջացնում` որպես սեռական զուգընկեր: Եվ, չնայած ամուսնու հնազանդությանը, ամուսինների միջև եղած տարաձայնություններն ու բախումները չեն դադարում: 

Ամուսինները խորհրդի և բուժման համար պետք է բժշկի դիմեն ժամանակին, քանի դեռ իրենց սերը չի մարել, քանի դեռ չեն կորցրել հարգանքը միմյանց նկատմամբ: Կլինիկական պրակտիկայում հանդիպում են դեպքեր, երբ ժամանակին ու ճիշտ ձեռնարկված բուժման շնորհիվ կարճ ժամանակում կարգավորվում է ամուսնական կյանքի ռիթմը, և 10-15 տարի անց ամուսինները յուրատեսակ «մեղրամիս» են ապրում: 

Հարցեր, պատասխաններ, մեկնաբանություններ